Սեմինարներ Սյունիքի մարզում՝ ընտանեկան բռնություն և թրաֆիկինգ թեմաներով

Սա իմ կազմակերպած երրորդ դասընթացն էր: Առաջինը կազմակերպել էի GLOW-ից վերադառնալուց հետո` օգոստոս ամսին, ՄԻԱՎ-ՁԻԱՀ թեմայով, երկրորդը դա իմ քրտնաջան աշխատանքի շնորհիվ իրականացված բնապահպանական ծրագիրն էր, հոկտեմբեր ամսին, որի արդյունքները հիանալի էին: Որոշակի դադարից հետո ցանկացա նոր ուժեր հավաքած վերսկսեմ հասակակցի կրթության գործունեությունս, և նախապատրաստվելուց հետո, երբ արդեն ամեն ինչ պատրաստ էր, համացանցից նյութեր էի ձեռք բերել տվյալ թեմաներով, բուկլետներ էի պատրաստել թրաֆիքինգի մասին և GLOW ամառային դպրոցում իմ դիտած տեսաֆիլմերի սկավառակն ինձ ուղարկել էին, ես որոշեցի դասընթացի օրը:

Քանի որ ես այս տարի ընտրվել եմ մեր դպրոցի աշակերտական խորհրդի նախագահ և  համագործակցում եմ ՎՈԼԴ ՎԻԺՆ միջազգային կազմակերպության հետ, որոշեցի հունվար ամսին ընտանեկան բռնություն թեմայով դասընթացն անց կացնել մեր համայնքում գործող ՎՈԼԴ ՎԻԺՆ կազմակերպության գրասենյակում, իսկ թրաֆիքինգ թեմայով դասընթացը կազմակերպեցի մեր դպրոցում: Պատրաստեցի հայտարարություններ 8-12-րդ դասարանների աղջիկներին տեղեկացնելու համար դասընթացների իրականացման օրերի, ժամերի և վայրերի մասին: Քանի որ սա իմ երրորդ փորձն էր այս բնագավառում, և իմ նախորդ դասընթացներից մասնակիցները շատ գոհ էին, ես այս անգամ շատ ավելի վստահ ու համարձակ էի գործում:

Հունվարի 20-ին` ՎՈԼԴ ՎԻԺՆ-ի գրասենյակում հավաքվեցին Խոտի միջնակարգ դպրոցի 8-12-րդ դասարանների 32 աշակերտուհիներ: Դասընթացին ներկա էին նաև մեր դպրոցից 2 ուսուցչուհիներ ու փոխտնօրենը: Դասընթացի սկզբում նախ պատմեցի, թե ինչ ենք անելու, ինչի մասին ենք խոսելու : Պատմեցի ընտանեկան բռնության մասին, դրանցից խուսափելու ճանապարհների մասին: Այնուհետև մասնակիցներին բաժանեցի 4 խմբի և նրանցից յուրաքանչյուրին բաժանեցի պաստառներ ու համապատասխան նյութեր և նրանց հանձնարարեցի պաստառի վրա ներկայացնել ընտանեկան բռնության օրինակներ ու գործողություններով ներկայացնել, թե ինչպես կարելի է կանխել և վերացնել ընտանեկան բռնությունը: Աղջիկների մոտ դա մեծ ոգևորություն առաջացրեց, որն էլ խթանեց նրանց ակտիվ մասնակցությանը և ազատ արտահայտվելուն:

Պաստառները ներկայացնելուց հետո մասնակիցները դիտեցին ֆիլմ ընտանեկան բռնության վերաբերյալ: Այնուհետևքննարկեցին ֆիլմը: Քննարկումն ընթանում էր հարց ու պատասխանի միջոցով և կարծիքների փոխանակմամբ: Մասնակիցները պատասխանեցին այն հարցերին, թե ինչպես կարող են ֆիլմում ներկայացվող ընտանեկան բռնության տուժողները խուսափել դրանից, ում դիմեն խնդիրը լուծելու համար:

Շատ հետաքրքիր, բովանդակալից և ուսուցողական դասընթաց էր, որից հետո մասնակիցները գոհ ու շնորհակալ հեռացան գրասենյակից` հաջորդ օրը թրագիքինգ թեմայով դասընթացին մասնակցելու ակնկալիքով:

Ես, դիմելով մեր դպրոցի տնօրենին, խնդրեցի նրան մեր դպրոցի ամենամեծ դասասենյակներից մեկում տեղադրել մեր դպրոցի հեռուստացույցն ու տեսարկիչը: Նա մեծ սիրով արձագանքեց իմ խնդրանքին: Ես նախօրոք դասընթացի համար հետդասընթացյան և նախադասընթացյան հարցաթերթիկներ էի կազմել: Դրանք դասընթացի սկզբում բաժանեցի մասնակիցներին, որից հետո նախ մասնակիցներին հարցրի, թե ինչ է թրաֆիքինգը, ինչ գիտեն այդ մասին: Կային մասնակիցներ, ովքեր շատ թե քիչ տեղեկացված էին թրաֆիքինգից: Մասնա կիցները նախորդ օրվա սեմինարի մասնակիցներն էին: Հարցաթերթիկները լրացնելուց հետո մասնակիցները դիտեցին թրաֆիքինգի վերաբերյալ ֆիլմը: Ես չափազանց զարմացած էի, մասնակիցները շատ մեծ հետաքրքրությամբ դիտում էին ֆիլմը, և շատերը հուզվել էին ֆիլմի տպավորիչ տեսարանների ժամանակ: Ֆիլմը դիտելուց հետո մասնակիցներին բաժանեցի ֆիլմի վերաբերյալ հետևյալ ուսուցողական հարցերը` ի՞նչ է կանանց թրաֆիքինգը, ի՞նչ կարող եք անել, որպեսզի պաշտպանեք ինքներդ ձեզ թրաֆիքինգից, ի՞նչ եք կարծում ինչու են կանայք դառնում թրաֆիկինգի զոհ: Հարցերը կարդալուց հետո բոլոր մասնակիցները ակտիվորեն քննարկումներ սկսեցին: Այնուհետև ես կրկնեցի ֆիլմի կարևոր դրվագները, որոնք ուսուցողական են, որից հետո մասնակիցներից մի քանիսը կիսվեցին իրենց դիտարկումներով և կարծիքներով: Դասընթացի վերջում մասնակիցները լրացրեցին հետդասընթացյան հարցաթերթիկները, իսկ այնուհետև ես նրանց բաժանեցի թրաֆիքինգի վերաբերյալ իմ ձեռքբերած նյութերը, և դրանով ավարտեցինք դասընթացը: Մասնակիցները շատ գոհ էին և ցանկություն հայտնեցին կրկին մեծ սիրով մասնակցել առաջիկայում կազմակերպվող դասընթացներին: Նախադասընթացյան և հետդասընթացյան հարցաթերթիկները համեմատելով` ես տեսա, որ մասնակիցների պատասխանները մեծ չափով փոխվել էին, այսինքն` մասնակիցների գիտելիքների չափը կտրուկ ավելացել էին, ինչն ամենակարևորն էր դասընթացի ժամանակ:

Դասընթացներին նախապատրաստվելիս ինձ օգնել են նաև իմ դասընկերները` համացանցով աշխատելու, հայտարարությունները տարածելու, բուկլետները բազմացնելու և այլ աշխատանքներում: Իմ շնորհակալությունն եմ հայտնում նրանց:  

Հարցազրույց դասընթացի մասնակիցներից մի քանիսի հետ՝

Դասընթացավար՝ Պատմեք, թե ինչ դասընթացների եք մասնակցել:

Լիլիթ Գևորգյան՝ Ես հունվարի 20-ին մասնակցել եմ ընտանեկան բռնություն թեմայով դասընթացին, որն ինձ շատ հետաքրքրեց, ես շատ գիտելիքներ ստացա, իմացա թե ինչպես կարող եմ խուսափել նման դեպքերից, և այս ամենից ոգևորված հաջորդ օրը` հունվարի 21-ին մեծ հաճույքով մասնակցեցի թրաֆիքինգ թեմայով սեմինարին, որն էլ ավելի հետաքրքիր ու ուսուցողական էր:

Դասընթացավար ՝ Լիլիթ, պատմեք, թե ինչպես էր կազմակերպված դասընթացը, ինչ մեթոդներ էին օգտագործվում:

Լիլիթ Գևորգյան՝ Ինձ համար կարևորն այն էր, որ դասընթացավարն անընդհատ փորձում էր տվյալ թեմաների շուրջ մեզ հնարավորինս շատ գիտելիքներ մատուցել: Շատ հմտորեն ու դյուրըմբռնելի ներկայացնում էր նյութը, և այն մատուցում տարբեր մեթոդներով` հարց ու պատասխանով, խմբային աշխատանքներով: Ֆիլմը դիտելիս զարմանալիորեն բոլորը կլանված դիտում էին, իսկ այն քննարկելու ժամանակ չկար մեկը ով կարծիք չարտահայտեր թեմայի շուրջ, բոլորս էլ շատ ակտին էինք:

Դասընթացավար ՝Թամարա, մի քանի խոսքով պատմեք դասընթացների մասին, որոնց դուք մասնակցել եք:

Թամարա Հովսեփյան՝ Դասընթացները շատ հետաքրքիր էին: Կարող եմ ասել, որ իմ գիտելիքները թրաֆիքինգի և ընտանեկան բռնության մասին կտրուկ ավելացել են: Շատ ուրախ եմ, որ նման ուսուցողական դասընթացներ են կազմակերպվում: Շատ հաճելի է. երբ մեր հասակակիցները մեզ համար ինչ որ բան են կազմակերպում ու փորձում են իրենց գիտելիքները փոխանցել նաև մեզ:

Դասընթացավար ՝ Եթե նմանատիպ դասընթացներ կրկին կազմակերպվեն, կմասնակցե՞ք:

Թամարա Հովսեփյան՝ Իհարկե կմասնակցեմ, շատ մեծ հաճույքով: Մեր հասակակիցների շրջանում նման թեմաների մասին իրազեկված լինելը շատ կարևոր է: Մենք պետք է իմանանք, թե ինչպես պաշտպանվենք ներկա ժամանակների վտանգավոր իրավիճակներից: Սյուզաննան մեզ պատմել է, որ ամառային դպրոցում է ձեռք բերել այդ կարևոր գիտելիքները, և մենք ցանկություն ենք հայտնել այս տարի անպայման ամառային դպրոցի մասնակցի դիմումը լրացնել և հնարավորության դեպքում հաճույքով մասնակցել ամառային դպրոցին:

Սյուզաննա Գալստյան

Գյուղ Խոտ, Սյունիքի մարզ
GLOW 2011