Ապրիլի 7-ը տոն դարձավ Քարակերտ գյուղի տատիկների համար

Ապրիլի 7-ին Քարակետ գյուղում իրականացվեց «Մայրության և գեղեցկության տոնը նաև տատիկներինն է» անակնկալ-ֆլեշմոբը, որի նպատակն էր միամսյակը տոն դարձնել գյուղի միայնակ և անապահով ընտանիքներում ապրող ամենամեծահասակ տատիկների համար և այսպիսով հասարակության մեջ հաստատել այն գաղափարը, որ այս տոն տատիկներինն էլ է: Միջոցառումն, որի մասնակիցները դարձան 15 համայնքաբնակ տատիկներ, ֆինանսավորվեց ԱՐՔԱՆԵ դրամաշնորհային ծրագրի կողմից: 

 
Sրամադրված գումարը օգտագործվեց տատիկների համար ծաղիկներ գնելու ու բացիկներ պատրաստելու նպատակով: Ծաղիկներն ու բացիկները բաժանելու հարցում օգնեցին Քարակերտի թիվ 1 միջն. դպրոցի սաներ, ովքեր փայլեցին իրենց համախմբվածությամբ ու ժամանակի ճիշտ օգտագործմամբ:
 
Այդ օրը երեխաները բաժանվեցին խմբերի ու առանձին-առանձին այցելեցին  բոլոր տատիկներին, ովքեր անակնկալի գալով հուզվում ու շփոթվում էին:

Այս ամենի անմիջական դիտորդները եղան գյուղի բնակիչները, ում կողմից և ողջունվեց այս նախաձեռնությունը: 

Նաիրուհի Միհրանյանը, ով համայնքի բնակիչներից է, ասում է. ^"Ցավոք սրտի,  առօրյա հոգսերն ու այլ խնդիրներ ստիպում են մարդկանց անտարբեր դառնալ միմյանց նկատմամբ, բայց երիտասարդ սերնդին այդ անտարբերության դեմ գնալով տեսնելը շատ ոգևորիչ է: Իրոք, մեր տատիկներն այն էակներն են, որոնք միշտ գնահատված պիտի լինեն, հատկապես գյուղական միջավայում: Հուսով եմ՝ նմանատիպ նախաձեռնությունները շարունակական կլինեն^"։

Ենգիբարյան Ժենյան, ով ֆլեշմոբի մասնակիցներից մեկն էր, չէր կարողանում զսպել արցունքներ: "Նման անակնկալի կյանքում չէի սպասի. սա իմ կյանքի ամենաուրախ օրերից մեկն է "- հավելեց Տիկին Ժենյան, ով այցելության ժամանակ որոշակի առողջական խնդիրներ ուներ: Մաղթում ենք նրան ու աշխարհի բոլոր տատիկների առողջություն ու բազմաթիվ նմանատիպ երջանիկ օրեր:

Անի Գևորգյան

ԱրքաՆե 2015 թվականի շրջանավարտ

Դպրոցական տաղավարի վերանորոգում (Արքանե դրամաշնորհային ծրագրի շրջանակներում)

Բարև իմ սիրելի Արքանե,

Ապրիլի 2-ին Արտենի գյուղի հիմնական դպրոցում տեղի ունեցավ իմ  դրամաշնորհային ծրագիրը` տաղավարի վերանորոգումը: Ծրագրին մասնակցում էին 7-9 դասարանի աշակերտները, մենք մաքրեցինք ու ներկեցինք տաղավարը և հիմա այն շատ գեղեցիկ և հաճելի տեսք ունի: Մեր աշխատանքը գնահատեցին մեր տնօրենը, ուսուցիչները և երեխաները: Սա իմ առաջին ինքնուրույն գործն էր իմ համայնքում և ուրախ եմ, որ կարողացա փոքր փոփոխություն կատարել իմ գյուղում և դպրոցում: Շնորհակալ ենք Արքանեին նման հնարավորության համար: 

Ինեսա Զոհրաբյան
Արքանե 2015 շրջանավարտ
Արագածոտնի մարզ 

ԱՐՔԱՆԵ աղջիկների տպավորությունները մենթորների հետ հանդիպումներից

ԱՐՔԱՆԵ աղջիկների առաջնորդության և զարգացման ծրագրի շրջանակներում 2015 թվականին ավելացրեցինք ևս մեկ բաղկացուցիչ մաս՝ մենթորություն։

Մենթորությունը գործընթաց է, որի ընթացքում առավել փորձառու, կայացած և հեղինակություն ունեցող անձինք (մենթորները) ուսուցանում, ուղղորդում, խորհրդատվություն են տրամադրում պակաս փորձառու անհատներին (մենթիներին)՝ նպաստելու համար նրանց մասնագիտական կողմնորոշմանը, զարգացմանը և անձնային աճին: Այսպիսով, այն մասնագետն է, ով ստանձնում է խորհրդատուի և ուղղորդողի դերը, որի գործունեությունն ուղղված է երիտասարդի մասնագիտական կողմնորոշմանը և ապագա կարիերայի նախագծմանը: Մենթորը տրամադրում է խորհրդատվություն այն մասին, թե ինչ դասընթացների մասնակցի մենթին, օգնում է սահմանել նպատակներ և խնդիրներ:

2015 թվականի ԱՐՔԱՆԵ ամառային դպրոցի մասնակիցները սկսեցին իրենց հարաբերություննները մենթորների հետ 2015 թվականի սեպտեմբեր - հոկտեմբեր ամիսներին։

Ստորև աղջիկներից երեքը իրենց տպավորություններն են ներկայացնում մենթորների հետ հանդիպումներից։

Մարիամ Հարությունյան

Ես մենթի եմ: Առաջին անգամ, երբ Արքանեում մասնակցեցի մենթորության սեմինարին,  չէի էլ կարող պատկերացնել, որ հետո իմ մոնթորի հետ այսքա՜ն շատ կկապվեմ: Անկեղծ լինեմ, մտածում էի, որ մենթորը չի կարող իր խորհուրդներով կյանքումս այսքան բան փոխել և նույն  մտքերով չէի կարողանում կողնորոշվել, թե ում առաջարկեմ լինել իմ մենթորը: Ընտրեցի մարդու ում ճանաչել եմ, բայց այքան էլ շփում չեմ ունեցել, պարզապես  ճանաչել ու հեռվից սիրել եմ իր տեսակը: Ընդամենը 2 տարի է մենթորս ինձնից մեծ, բայց ամեն անգամ իր խորհուրդներն այնքա՜ն մեծ ազդեցություն են ունենում որոշումներիս վրա: Արդեն մի քանի ամիս է, ինչ պարբերաբար հանդիպում ու զրուցում ենք, երբեմն որպես մենթոր-մենթի, երբեմն՝ ընկերուհիներ, իսկ երբեմն անգամ քույրեր: 

Հիմա վստահաբար կարող եմ ասել, մենթորությունը ամենակարևոր ծրագրերից մեկն է, որ անհրաժեշտ է բոլորիս, ցանկացած տարիքում: Մեզ՝ բոլորիս, անհրաժեշտ է մեկը, ով անկեղծ խորհուրդներ կտա, մի կողմ կդնի իր իսկ ցանկությունները ու սրտացավ կլինի կարիերայիդ, ապագայիդ համար: 

Շնորհակալ եմ քեզ Արքանե: 

Շնորհակալ եմ քեզ Զարին:

 

Ինեսա Զոհրաբյան 

Ողջույն, իմ սիրելի ԱՐՔԱՆԵ,

Մի  քանի ամիս առաջ համաձայնեցի մասնակցել ԱՐՔԱՆԵ ծրագրի շրջանակներում կազմակերպվող մի հիանալի նախագծի` մենթորությանը: Այս նախագիծը հիանալի է անցնում մեր` Արքանեի մասնակիցների համար. այն շատ զարգացնող է, մոտիվացնող, մեծ գիտելիքներ տվող: Մենթորը` ում մենք ենք ընտրել մեզ համար, տալիս է մեծ փորձ, խորհուրդներ՝ կողմնորոշվելու համար , որը դրական ազդեցություն է ունենում մեզ վրա:

Իմ մենթորի հետ հանդիպումներն անցնում են հիանալի: Սա շատ լավ հնարավորություն է իմ բոլոր հարցերը տալու և պատասխաններ ստանալու համար: Իմ բոլոր հարցերը, ակնկալիքները բավարարվում են: Մենթորը կարծես մեծ ուսուցիչ լինի մեզ համար, ով մեզ ճիշտ  կողմնորոշում է: Մենթորի հետ հանդիպելու կոնկրետ ռեժիմ և ժամանակահատված կա, բացի դրանից  մենք կարող ենք շփվել նաև վիրտուալ ձևով (Facebook, Skype և այլն) : Այդ ռեժիմի, կոնկրետ հանդիպումերի ընթացքում  տրված թեմաները շատ հետաքրքիր են: Օրինակ՝ «մասնագիտական կողմնորոշում և ուղղորդում» թեման շատ լավն էր և օգնեց ինձ ավելի ճիշտ կողմնորոշվել, ընտրել այնպիսի մասնագիտություն, որն իրոք աշխատաշուկայում էլ մեծ պահանջարկ կունենա: Եվ ընդհանրապես բոլոր թեմաները ինձ համար ուսուցանող են և ավելի նպատակասլաց դարձնող: Սա մեծ հնարավորություն է նաև լավ կարիերա ունենալու և այն ավելի մեծացնելու համար: Եվ քանի որ մենթորը մեր կողմից է ընտրված շփումը ավելի ազատ է լինում,և  ինքն էլ իրեն լավ է զգում , որ ընտրվել է  մեր կողմից: Այս ամենի շնորհիվ ես սովորեցի ու դեռ շարունակելու եմ սովորել այնպիսի բաներ, որ հնարավոր է ապագայում չստանամ: 
Ես, հանդիսանալով մենթի, կարող եմ նշել , որ մենթորությունը օգնում է զարգանալ և տեղեկատվություն ձեռք բերել:

Տաթևիկ Հարությունյան

Գուցե  փնտրում ես մեկին, ով քեզ կօգնի մեծ և փոքր որոշումներ կայացնելիս, ցանկանում ես կիսվել նպատակներդ, խոսել քեզ հուզող հարցերի մասին և պարզապես գտնել մեկին, ով քեզ կոգեշնչի:

Երևի ,մենթոր ես փնտրում:

-Բար՛և, կդառնաս իմ մենթորը:

-Մեծ հաճույքով:

Այսպիսի պատասխան չէի սպասում մեկից, ում մի քանի օր էր ինչ ճանաչում էի: Եվ ահա պատրաստվում եմ կիսվել շատ հարցերով, լսել նրա խորհուրդները:

Հենց այսպես էլ ներգրավեցի «Արքանե» ծրագրի մենթորության  նախագծում ու սկսեցի մի փոքր ժամանակ  հատկացնել մի ծրագրի համար , որը անծանոթ էր ինձ և անորոշ:

Արդեն մի քանի ամիս է, ինչ ես հաճույքով սպասում եմ ամսվա այն օրերին, երբ կրկին պետք է հանդիպեմ  մենթորիս, և հետաքրքիր քննարկումներ անցկացնենք:

Ծրագիրը շարունակվում է, սակայն այսօր էլ կարող եմ ասել, որ ուրախ եմ  մասնակցելու, նոր բան ստանալու համար: