Սեմինար Կոթիում 25.07.2014

 
Հուլիսի 25-ին Տավուշի մարզի Կոթի գյուղում ԳԼՕ Աղջիկների Առաջնորդության և Զարգացման ամառային դպրոցի (GLOW - Girls Leadership and Empowerment Project) շրջանավարտներս` Աննա Մինասյան և Մարիամ Հեպինյան, կազմակերպել էինք սեմինար՝ նպատակ ունենալով մեր հասակակիցների հետ կիսվել ամառային դպրոցում ստացած մեր գիտելիքներով: 

    Սեմինարի առաջին թեման թրաֆիքինգն էր: Քննարկման ընթացքում խոսեցինք թրաֆիքինգի մասին, կազմակերպվեց ֆիլմի դիտում-քննարկում, այնուհետև խոսեցինք այն մասին, թե ինչպես խուսափել թրաֆիքինգից: Սեմինարավար՝ Աննա Մինասյան

  Երկրորդ թեման գենդերն էր: Երեխաները դասակարգեցին տարբեր մասնագիտություններն ըստ ընդունված կարծրատիպերի,  թե որ մասնագիտությունն ավելի շատ որ սեռին է համապատասխանում: Այնուհետև կազմակերպվեց բանավեճ, որի ընթացքում յուրաքանչյուրն իր կարծիքն էր արտահայտում աղջկա և տղայի դերերի բաշխման վերաբերյալ: Բանավեճն ավարտվեց այն եզրահանգմաբ, որ աղջկա և տղայի իրավունքները և դերերը հավասար են: Սեմինարավար՝ Մարիամ Հեպինյան

      Խոսեցինք նաև ինքնագնահատականի մասին: Քննարկվեց, թե որքանով է շրջապատի կարծիքը ազդում մարդու ինքնագնահատականի վրա: Կազմակերպվեց այդ թեմայի վերաբերյալ նյութի ընթերցում-քննարկում: Մասնակիցների շրջանում կազմակերպվեց խաղ, որի ժամանակ յուրաքանչյուրն իր կարծիքն էր արտահայտում մյուսի մասին:

  Հանդիպման ավարտին, ելնելով մասնակիցների արձագանքից՝ ուրախ էինք արձանագրել, որ մատուցված նյութերն ընկալվել են մեր հասակակիցների կողմից և նրանք տուն են գնում նոր բան սովորած: 

ԳԼՕ-ն՝ թեկուզ կարճ, բայց ամենասպասված ու անմոռանալի երազ

Իմ հիշողության անծայրածիր տիեզերքից ոչ ոք չի կարող ջնջել իմ կյանքի ամենաերջանիկ և ամենաուրախ րոպեներն ու պահերը, որ պարգևել է ինձ ԳԼՕ-ն: ԳԼՕ-ն ինձ համար կյանքի նոր ձեռքբերումների դպրոց էր, որի ճանապարհին ես ձեռք բերեցի բարի ու լավ ընկերներ, օգտակար և հետաքրքիր գիտելիքներ, և որ ամենակարևորն է` կամքի ուժ, ինքնավստահություն, վճռականություն: Ես վերջապես հասկացա, թե ինչ է նշանակում պայքարել նպատակին կամ երազանքին հասնելու համար: Եվ այդ ամենի համար ես շնորհակալ եմ իմ սիրելի ջոկատավարներին, կազմակերպիչներին, կամավորներին և ընկերներին, ովքեր այժմ իմ կյանքի մի մասն են կազմում: Եվ հիմա ես հասկացել եմ, որ առանց ընկերոջ մարդը նման է մի թևանի թռչունի, ով ոչ կարողանում է վեր բարձրանալ և ոչ էլ անհոգ ճախրել օդում: Ու ես հպարտ եմ, որ ունեմ ընկերներ, որոնց կարող եմ վստահել, և որոնց օգնությամբ կարծում եմ, որ իմ կյանքում կլինեն նորանոր և բազմաթիվ հաղթանակներ: Եվ վերջում՝ ԳԼՕ-ն ինձ համար մի հեքիաթային աշխարհ էր, որն իմ սրտի ամենամեծ անկյունի ամենանվիրական և ամենասպասված երազն էր, երազ, որը դարձավ իրականությորն և երազ, որը շատ կարճ, բայց հաճելի ու հիանալի հիշողություններով պարուրեց իմ սիրտն ու հոգին: Սիրում ու կարոտում եմ բոլորիդ: Համոզված եմ, որ և’ ես, և’ դուք ամուր կպահենք մեր ընկերությունը` դարձնելով այն ավելի ամուր ու հավերժական:

Անի Հարությունյան, 16 տարեկան

Սյունիքի մարզ, գյուղ Տաթև

ԳԼՕ-ն իմ կյանքում

Իջևան Ինֆոտանը,որտեղ արդեն  մեկ տարի շարունակ կամավոր եմ և ակտիվորեն  մասնակցում եմ կազմակերպվող ամենատարբեր դասընթացների, սեմինարների և ծրագրերի, տեղեկացա նաև Աղջիկների Առաջնորդության և Զարգացման դպրոցի (GLOW-Girls Leading Our World) մասին և անմիջապես որոշեցի մասնակցել և լրացնել գիտելիքներիս պակասը: Հայտը լրացրի և ի ուրախություն ինձ անցա: Շատ ուրախ էի, քանի որ շատ սպասելիքներ ունեի ԳԼՕ-ից: Շատ երկար ու անհամբերությամբ եմ սպասել ԳԼՕ ճամբարի մեկնարկին: Եվ ահա ես արդեն ԳԼՕ-ում էի: Ամեն ինչ նման էր հեքիաթի: Շրջապատված էի միայն բարի ու անկեղծ մարդկանցով, ովքեր ամեն վայրկյան պատրաստ էին օգնության ձեռք մեկնել քեզ: Բոլորը շատ ուրախ էին , ժպտում էին և փորձում էին հնարավորին չափ կիսվել իրենց գիտելիքներներով: ԳԼՕ-ն ինձ շատ բան տվեց: Ես հասկացա գնահատել ինքս ինձ, հարգել ուրիշի կարծիքը` ինչպիսին էլ այն լինի, ստացա այնպիսի գիտելիքներ, որոնք ոչ մի տեղ չէի կարող ստանալ (ինչպես լինել լավ առաջնորդ, ինպիսին պետք է լինի թիմը, ինչ է գենդերը և այլն) և ի վերջո ձեռք բերեցի հրաշալի ընկերներ: Հիմա պատրաստվում եմ կիսել իմ գիտելիքները հասակակիցներիս հետ: Շատ ուրախ եմ, որ ես էլ հնարավորություն ստացա հայտնվել մի հեքիաթում, որի անունն էր ՝ԳԼՕ (աղջիկների առաջնորդության դպրոց):

Աննա Մինասյան, 15 տարեկան

Իջևան, Տավուշ

GLOW 2014-ի ամենածափահարող մասնակցի տպավորությունները..☺

  

2014 թվական, հունիսի 30, ժամը 11:00, սպիտակ  միկրոավտոբուս, անհամբերությամբ ծանոթացող լիքը աղջիկներ, իմ և՛ տխուր, և՛ ուրախ աչքեր, որոնք կարծես չէին ուզում  գնալ մի գողտրիկ սարերի մեջ ծվարած, բայց և սքանչելի բնությամբ շրջապատված  վայր, որը մեր շատ սիրելի աղջիկների առաջնորդության և զարգացման ճամբարն էր: Ճանապարհին այնքան էլ ուրախ չէի ,իսկ երբ որ հասանք  ու տեսա իմ շատ սիրելի ընկերուհուն՝ Ռոզային, շաաաա՜տ  ուրախացա: Հասնելով ճամբար՝ շուտափույթ  ճաշեցինք, քանի որ ճանապարհային խնդիրների պատճառով ուշացել էինք ճաշի գրաֆիկից: Այնուհետև մեր կրտսեր ջոկատավարների գլխավորությամբ  ծանոթացանք մեր սենյակների հետ: Արդեն հարմարվել էի ՝ նոր շրջապատ, նոր տարբեր մտածելակերպի անձինք, սակայն երբ ծանոթացա բոլորի հետ, զգացի, որ նրանք բոլորն էլ յուրովի շատ լավ բնավորության տեր մարդիկ էին: Տաղանդի երեկոյին մասնակցեցի իմ գրած կոմիքսներով: Հոլիվուդյան երեկոյին մասնակցեցի իմ լավ ընկերուհիներ՝ Խանում Գևորգյանի և Անի Դանիելյանի  բեմադրած մնջախաղով, որն, իմիջայլոց, ինձ շաաա՜տ դուր եկավ: ԳԼՕ-ում  նորաձև շապիկներ ստանալուց բացի զինվեցի նոր գիտելիքներով՝  սովորեցի շատ պարեր, որոնցից օրինակ՝ <<նոր պար>>-ը կամավոր կերպով սովորեցնում եմ IMPACT բիզնես ցրագրում սովորող աշակերտներին: Հասկացա, թե ինչպես կարելի է կոնֆլիկտներից ստացվող վեճերից զերծ մնալ, հասկացա որ պետք է լինել զիջող, հարգալից և որ ամենակարևորն է՝ լսել և սովորեցնել մեր իմացածը դիմացինին, որը ես պատրաստվում եմ անել իմ սեմինարների միջոցով: Հաա՛,մեկ էլ նշեմ, որ Գլօվուդի մրցանակաբաշխության ժամանակ արժանացա <<ամենահայկական մասնակից>> տիտղոսին, որի համար շատ շնորհակալ եմ: Դե՛ ինչ, խոստանում եմ շաաա՜տ սեմինարներ անել, քանզի պայքարելու եմ ԳԼՕ 2015թ կրտսեր ջոկատավար դառնալու համար:

Վանուհի Խաչատրյան, 14 տարեկան

Արտենի, Արագածոտն

Ապագա սեմինարները՝ ԳԼՕ 2014-ի շարունակություն

Ես Լիլիթն եմ՝ ԳԼՕ աղջիկների առաջնորդության և զարգացման ծրագրի մասնակից։ Մասնակցելով ԳԼՕ-ին ես ստացա մի շարք գիտելիքներ, ձեռք բերեցի նոր ընկերներ, տարբեր հմտություններ, սեփական Ես-ին ավելի լավ ճանաչելու, թիմում աշխատելու և ավելի լավ առաջնորդ լինելու կարողություն, ինչպես նաև ստացա շաաաատ գեղեցիկ վերնաշապիկ։ Կկազմակերպեմ սեմինարներ թրաֆիքինգի, բնապահպանության, առաջնորդության և գենդերի մասին և գիտելիքներս կկիսեմ համայնքի բնակիչների հետ։ Շնորհակալ եմ ԳԼՕ-ի կազմակերպիչներին, ջոկատավարներին, կամավորներին և կրտսեր ջոկատավարներին։

Լիլիթ Գրիգորյան, 14 տարեկան 

Մարզ Լոռի, Բազում

ԳԼՕ-ն ինձ համար նոր ձեռքբերումների դպրոց

Բարև ձեզ: Ես Էլենա Խաչատրյանն եմ, 14 տարեկան, ԳԼՕ 2014-ի շրջանավարտներից եմ: ԳԼՕ-ն ինձ շատ բան տվեց, շատ հմտություններ սովորեցրեց: Ես սովորեցի թիմում աշխատել, թիմային աշխատանքների ժամանակ առանց կաշկանդվելու արտահայտել իմ կարծիքը, թիմում լինել առաջնորդ: Ստացել եմ մեծ գիտելիքներ բնապահպանություն, առաջնորդություն, թրաֆիքինգ, գենդեր և այլ թեմաների մասին: Այս 7 օրերը բացի գիտելիքների հարուստ պաշարից ինձ նաև հնարավորություն տվեցին ձեռք բերել նոր ընկերներ` թե՛ ինձնից մեծ, թե ՛իմ տարիքի: ԳԼՕ-ից ես վերադարձա մեծ քանակով գիտելիք և շատ ընկերներ ձեռք բերած:
Սիրով՝ Էլենա Խաչատրյան, 
14 տարեկան,

Լոռու մարզ, քաղաք Վանաձոր