Գրական ակումբ Շենիկ գյուղում

Գաղափարներ, գաղափարներ, երբեմն՝ օդում կախված, բայց ո՛չ այս անգամ: 

Արքանեն միշտ հայտնվում է այն ժամանակ (իրականում, այն երբեք էլ չէր գնացել ), երբ դու ունես ցանկությյուններ, լավ ու հետաքրքիր գաղափարներ, ու քեզ պետք է մի փոքր աջակցություն՝ ֆինանսական, և վերջ:

Գյուղում գրական ակումբ ստեղծելը և երեխաներին դեպի «գիրքը»  ուղղորդելը, երկար ժամանակ  էր իմ մտքում պտտվում: Եվ... Եվ ես լրացրի դրամաշնորհի հայտը, հաղթեցի, և հիմա կսել եմ իրականացնել իմ ծրագիրը:

Հ.Գ. Հավատացեք, համայնքիդ համար լավ բան անելուց լավ բան, չկա աշխարհում:

Հ.Գ. Սպասեք նորությունների և ամենաանկեղծ ժպիտների:

Անուշ Մկրտչյան  15տ Արմավիրի մարզ Շենիկ գյուղ

Գիրքը՝ մտքի լուսավորման աղբյուր

Մեր հարազատ Արքանե... Հաշվի առնելով այն, որ այսօրվա երիտասարդությունն օտարվել ու հեռացել է գրականությունից, և ընթերցանությունը հետին պլան է մղվել, որոշեցինք <<Ստեփանավանի երիտասարդական կենտրոն>> հկ-ի կողմից տրվող դրամաշնորհային ծրագրի շրջանակներում համալրել գյուղի գրադարանը նորանոր գրքերով և սեր արթնացնել գրքի ու գրականության հանդեպ, քանզի գիրքն է ընդլայնում մարդու մտահորիզոնը և լուսավորում միտքն ու հոգին։ Դրամաշնորհին ավելացավ նաև մեր ուսուցչուհու՝ Ասյա Ավագյանի ջանքերով հավաքված գումարը, և գյուղի գրադարանի հին գրքերի կողքին իրենց տեղը գտան պատկերազարդ և նորակազմ գրքեր։

Սոնա Ղավալյան

17 տարեկան

Վերին Կարմիրաղբյուր

Տավուշի մարզ

ԱՐՔԱՆԵ փոքր ծրագրային առաջարկների ընդունում

Սիրելի ԱՐՔԱՆԵ մասնակիցներ,

Դուք ձեր համայնքներում և ընդհանրապես ձեր շրջապատում հաճախ տեսնում եք խնդիրներ, որոնք կարող եք լուծել հենց դուք: Դա կարող է լինել ֆլեշմոբ կամ դասընթաց, համայնքային իրազեկում կամ ծառատունկ... կամ հենց այն, ինչ դուք եք մտածել:

Ստեփանավանի Երիտասարդական Կենտրոնը «ԱՐՔԱՆԵ» ծրագրի շրջանավարտներին տալիս է նման հնարավորություն՝ իրականացնել փոքր ծրագրեր ձեր իսկ համայնքներում:

Ծրագիրը նախատեսած է ԱՐՔԱՆԵ ամառային դպրոցի վերջին տարվա շրջանավարտների համար: Կարող են դիմել նաև նախորդ տարիների շրջանավարտները, սակայն այս տարվա շրջանավարտների հետ միասին:

Մեկ դիմորդի համար դրամաշնորհի գումարը կազմում է 30.000 (երեսուն հազար) դրամ, իսկ մեկից ավելի դիմորդ-մասնակիցների դեպքում՝ 40.000 (քառասուն հազար) դրամ:

Ծրագրի իրականացման ժամկետը մարտի 1-ից ապրիլի 30-ն է:

Ծրագրի հաշվետվության վերջնաժամկետը մայիսի 18-ն է:

Ծրագրին դիմելու համար անհրաժեշտ է լրացնել ստորև բերված Դիմում-հայտը, Գանտտի աղյուսակը, Ծրագրի բյուջեն և բյուջեի նկարագրությունը: Ամենավերջում կարող եք գտնել հայտադիմումը լրացնելու ուղեցույց, որը ձեզ կօգնի կողմնորոշվելու և հայտն ավելի գրագետ լրացնելու:

Իսկ եթե այնուամենայնիվ կառաջանան հարցեր, ապա առանց հապաղելու գրեք Arqane.syc@gmail.com էլ.հասցեին կամ զանգահարեք ծրագրի պատասխանատու Մանե Պապյանին, հեռախոսահամար՝ 093 844 764:

Դրամաշնորհին դիմելու վերջնաժամկետն է ս․թ․ փետրվարի 14-ը, ժամը 23.59: 

 Մանրամասները և դիմումի ձևը կարող եք ներբեռնել այստեղ։

Համադրելով Արքանեն և բիզնեսը

Իմ սիրելի Արքանե, տուն վերադառնալուն պես հասկացա, որ Արքանեում անցկացրած օրերը պարզապես հետաքրքիր ու ուրախ օրեր չեն եղել: Դրանք մեծ ազդեցություն են ունեցել ինձ վրա և այնքան բան փոխել իմ մեջ: Այս նոր էությամբ ոգևորված անընդհատ մտածում էի, թե ինչպես կիսվեմ մյուսների հետ, ինչպես ինքնաարտահայտվեմ այդ նոր էությամբ: Ու հանկարծ որոշեցի համադրել իմ ամենասիրած երկու բաները՝ Արքանեն ու բիզնեսը: Կիրառելով Արքանեում ստացած համարձակությունը, ինքնուրույնությունը, նոր հմտությունները և օգտվելով Արքանեի աջակցությունից՝ կազմակերպեցի բիզնես դասընթացներ 10-րդ դասարանցիների համար: Միասին քննարկեցինք բիզնես սկսելու քայլերը, բիզնեսը՝ որպես մասնագիտութուն, հաջողակ ստարտափներ /մեկնարկն/ և դրանց հաջողության գաղտնիքները, մարքեթինգն ու դրա բաղադրամասերը ու էլի շատ հետաքրքիր թեմաներ բիզնեսի մասին: Երեք շաբաթ միասին աշխատելու արդյունքում վերջին դասընթացին մասնակիցները ստեղծեցին իրենց իսկ բիզնես մոդելները և մեծ ոգևորությամբ ու նոր գիտելիքներով ավարտեցինք դասընթացները: Թվում է՝ պարզապես փորձեցի փոխանցել գիտելիքներ նրանց, բայց այդ ընթացքում այնքան փորձ, ինքնավստահություն ու նոր ընկերներ ձեռք բերեցի, որ նկարագրելու չէ:

Շնորհակալ եմ, իմ սիրելի Արքանե, իմ կյանքում այսքան գեղեցիկ պահեր ավելացնելու համար:

Էլինա Հովակիմյան
17 տարեկան

Բարենորոգման աշխատանքներ

Բարև, սիրելի Արքանե:

Արդեն սկսվել են դրամաշնորհի աշխատանքները: Ես և իմ դասարանցիները գնացինք մանկապարտեզ և ներկեցինք 1 տնակ, երկու աթոռակներ՝ նախապես պայմանավորվելով մանկապարտեզի տնօրենի հետ: Սղարաններից միայն մեկն ունի թարմացման կարիք, և դեռ պետք է ներկենք մյուս տնակն ու ցանկապատը:

Այնքան ոգևորված էինք, որ չհասցրինք անգամ իրար հետ խոսել:

Նկարներն ակնհայտորեն ներկայացնում են այսօրվա տնակի պատկերը, և թե ինչպիսին էր այն նախկինում:

Էդիտա Գալստյան

Շիրակի մարզ, ք, Գյումրի

Մեծ տպավորություններով

Ողջու՜յն, իմ շատ սիրելի Արքանե: Տպավորված 7-օրյա հանգստով և ստացած գիտելիքներով՝ ամեն վայրկյան ցանկանում եմ իմ փորձով կիսվել: Եվ ահա ամռան ընթացքում ֆրանսերենի դասընթացների հաճախելը առիթ հանդիսացավ Արքանե-ում ստացած գիտելիքներս հասակակիցներիս փոխանցելու համար: Փորձեցի հասակակիցներիս ներկայացնել Արքանե-ում խաղացած խաղերը և դրանց խորիմաստությունը: Դասընթացը ես՝ Մարիամ Եղոյանս,  անցկացրի Գավառի Ավ. Իսահակյանի անվան թիվ 4 հիմնական դպրոցում: Խաղերին մասնակցեցին 6-8 աշակերտներ: Խաղերից հետո ծավալվեց քննարկում, որի ժամանակ աշակերտները հայտնեցին իրենց տպավորությունները: Յուրաքանչյուրը յուրովի ներկայացրեց իր կարծիքը: Աշակերտները հասկացան յուրաքանչյուր խաղի հիմնական նպատակը: Խաղերից հետո բոլորը կիսվում էին իրենց դրական տպավորություններով և նույնիսկ հաջորդ օրերին առաջարկում, որ նմանատիպ խաղեր կազմակերպեմ: Իհարկե ես նրանց տեղեկացրի, որ այդ ամենը ինձ տվել է Արքանե Աղջիկների Առաջնորդության և Զարգացման Ծրագիրը: 

Մարիամ Եղոյան