Հեքիաթ, որը չավարտվեց

Հեքիաթ, որ չավարտվեց, այլ մնաց մեր սրտում որպես անշեջ մի կերոն:

Հեթիաթ, ուր արքայադուստրերը սովորում են լինել ուժեղ և անկախ:

Հեքիաթ, ուր մենք հաղթում ենք ինքներս մեզ:

Հեքիաթ, որտեղ հաղթում են բոլորը...

Անցուդարձ ԱՐՔՈՒՆԻՔԻՑ

Օգոստոսի 8, 2015թ....Ստեփանավան...

Այս առավոտ Լոռի աշխարհի Ստեփանավան քաղաքում Արքանե արքունական պալատում օրը սկսվեց մարզումով: Արքայական նախաճաշը վայելելուց հետո, նրանց սպասվում էր հագեցած ևս մեկ օր: Թագավորական խորհրդի օրակարգում կարևորվել էր դեռատի արքայադստրերի հասարակական գործունեությանն և կարիերային վերաբերող հիմնահարցերը: Որպես ապագա թագաժառանգներ և մեծ արքունիքի առաջնորդներ՝ ծանոթացան ծրագիր գրելու հիմնական կառուցվածքին և ծրագիր մշակելու հմտությանը, կամավորության հիմունքներին, զանգվածային առցանց բաց դասընթացի հնարավորություններին, հասակակցի կրթության կարևորությանը:

Օրն ավարտվեց պալատական խնջույքով. երգուպար, ասմունք,  անհամար սելֆիներ ու լուսանկարներ ...

Նաթելա Նավասարդյան

Լուսինե Վարդումյան

Ժպտացեք՝ նկարում եմ

Ասեք «ժարիտ»՝ նկարում եմ... Էլ ի՞նչ «Արքանե» առանց արքայական նկարների: Օրն սկսվեց լուսանկարվելով: Երևի չասեմ, թե ինչքան էինք սիրունացել նկարվելու համար: Պատկերացրեք մի նկար, որում մարդկանցով թագ է պատկերված, բայց նկարի ամենագրավիչ մասը պայծառ դեմքերն են:

Քանի որ օրվա թեման բնապահպանությունն էր, նկարներից ու սելֆիներից հետո ուրախ ավտոբուսներով ուղևորվեցինք Դենդրոպարկ՝ բնությանը մոտ լինելու և այն ավելի լավ զգալու: Այստեղ աղջիկները շրջեցին արգելոցում, ծանոթացան նրա պատմությանը և բուսատեսակներին, ինչպես նաև՝ ջրի ֆիզիկական հատկությունների թեստ արեցին: Իհարկե, թեստից առաջ, ընթացքում և հետո նկարներն ու սելֆիները շարունակվում էին: Բնությանը մոտ լինելն օգնում է իսկապես սիրել այն:

Օրվա երկրորդ կեսին դասընթացներ անցկացվեցին առողջ սննդի, սեռական առողջության և ՄԻԱՎ/ՁԻԱՀ-ի թեմաներով: Ոմանք որոշեցին հրաժարվել իրենց սննդային վնասակար սովորություններից: Իսկ որքանո՞վ կստացվի, հետո կիմանանք: Առաջին քայլն արված է՝ որոշված է: Սեռական առողջության թեմայով քննարկման ընթացքում հարցերի տարափ էր: Աղջիկներն իրենց հուզող հարցերի պատասխանները ստացան: Ինչպես իրենք են ասում՝ այս օրը հագեցած էր նոր տեղեկություններով:

Հ.Գ. Չնայած զբաղված երեկոյին, մեկ է, չմոռացանք նկարվելու մասին:

Լիլիթ Հակոբյան

‹‹Արքանե›› անառիկ ամրոցի հուշագիրը

‹‹Արքանե›› պալատական ամրոցի քարե պատերից ներս թևածում է աննկարագրելի հրճվանք, խինդ ու կորով, սեր ու ջերմություն: Արքունյաց պալատում հետզհետե օրերն ավելի են թեժանում՝ նպաստելով արքայադստրիկների և դասընթացավարների միջև առավել սերտ փոհարաբերությունների հաստատմանը, փոխըմբնմանը: Ահա ևս մեկ օր էլ եկավ ու անցավ՝ հավերժանալով կայսերական մագաղաթների դարավոր շտեմարանում:

‹‹Արքանե››-ում չորրորդ օրը բավական հագեցած էր ու տեղեկատվական: Սովորության համաձայն գեղանի օրիորդներից ոմանք իրենց օրը սկսեցին մարմնամարզությամբ, մյուսները հաճախեցին յոգայի, մնացածները՝ վազքի և ազգագրական պարերի:

Այնուհետև աղջիկները  մի շարք քննարկումներ իրականացրին մարդու իրավունքների, գենդերային դերերի, ընտանեկան բռնության և թրաֆիքինգի մասին: Օր օրի այս զարմանահրաշ աղջիկները հարստացնում են իրենց գիտելիքների պաշարը, ձեռք են բերում նոր փորձառություն, իրենց բացահայտում են տարբեր իրավիճակներում՝ դրսևորելով մարդկային արժեքավոր որակներ:

Այս հեքիաթային օրը եզրափակվեց ստեղծագործական երեկոյով, որտեղ հեզաճկուն նաիրուհիները առիթ ունեցան ներկաներին զարմացնել իրենց բազմաշնորհ կարողություններով ու հմտություններով: 

Արքունական ամրոցի պերճաշուք պատուհաններից ներս են սողոսկել գիշերային լուսատուի արծաթափայլ շողերը: Աստղազարզ գիշեր է, շուրջբոլորը՝ մեղմ ու եթերային լռություն, որը, սակայն, մերթ ընդ մերթ ընդհատվում է արքունյաց թիկնազորի խրոխտ ոտնաձայններից, ովքեր անձնվիրաբար հսկում են վսեմաշուք պալատի չքնաղ գեղեցկուհիներին:

Այժմ կարծես թե ամեն ինչ կարգին է, ժամեր անց նորից կմեկնարկի հերթական լուսաբացը՝ ազդարարելով նոր բացահայտումների ու ձեռքբերումների սկիզբը:

Ալմիրա Նիկողոսյան  

Առողջ հոգի առողջ մարմնում

Առողջ հոգի առողջ մարմնում...Արքունական տան ազնվականության գրավականը:

Փրկության թունել, թունավոր սարդոստայն, փրկել թագավորին, կոկորդիլոսներով լի գետ...փորձությունների մի ամբողջ շարք, որ սպառնում էր պալատական անձնակազմին: Աղջիկները պետք է անեին, թերևս, իրենց առաջին քայլերն, իբրև առաջնորդներ: Որպես սկսնակներ՝ նրանք բավականին հմուտ էին  և ունեին թիմում գործելու  և հաջողության հասնելու մեծ շնորհք: Իսկ օրվա վերջում ծրագրի հիմնական թեմաներից մեկն՝ առաջնորդությունը, նրանց համար բացահայտված էր:
Աղջիկները հնարավորություն ունեցան սովորել խոսքի ճիշտ կառուցման և մատուցման հմտությունները: Իրենք իրենց համար բացահայտեցին, թե ինչ է միջանձնային կոնֆկիկտը, ինչպես հնարավորինս խուսափել, իսկ պետքն եղած դեպքում ճիշտ  լուծում տալ հարցին: Հատկապես տպավորիչ է նրանց փոխզիջման գնալու պատրաստակամությունը:

Հագեցած ու էմոցիոնալ օրվա ավարտը չէր կարող տաղանդներ չբացահայտել: Տաղանդների բազմազանություն, որը կզարմացներ ցանկացածին՝ գորգագործությունից մինչև խաղաքարտերով հնարքներ, ֆիլմեր, նկարներ, ուրախ երգ ու պար... Չնայած Լոռվա բնության անակնկալներին՝ հորդառատ անձրև, ամպրոպ, կայծակ և հոսանքի բացակայություն, արքունիքում շարունակվում էր տիրել բարձր տրամադրությունն ու խրախճանքը:

Նաթելա Նավասարդյան

Նարինե Մարգարյան

Ճանաչեք ձեզ, սիրեք ձեզ

Այսօրվանից առողջ ենք ապրում և սովորում՝ զվարճանալով: Առավոտյան ժամը 8-ին «Արքանե» արքունիքի բնակիչներն արդեն պատրաստ էին մարմնամարզության և օրվա բոլոր նորությունների համար: Իսկ նորություն՝ ինչքան ասես: Այսօր մասնակիցների ամենամեծ բացահայտումը հենց իրենք էին, քանի որ օրվա թեման ինքնաճանաչումն էր:

            «Մինչև քեզ լիովին չբացահայտես, չես սիրի ...»,- համոզված է «Արքանե» ամառային դպրոցի մասնակիցներից Էլենը: Աղջիկները տարբեր վարժությունների միջոցով ինքնավերլուծություն կատարեցին, ավելի շատ բան իմացան միմյանց մասին և կարծես թե ավելի շատ սկսեցին սիրել միմյանց J

Օրվա առանցքային թեմաներից մեկը՝ թիմային աշխատանքը, շարունակվեց երեկոյան «Գանձերի որս» խաղով, որն աղջիկներին այնքան ոգևորեց, որ կասկածում եմ, թե հետո հեշտ կքնեին: Ականջի ծայրով մի քանի անգամ լսեցի, որ ուզում են իրենց լեզվով ասած՝ «գիշերանոցային խնջույք» (պիժամա փարթի) կազմակերպել, բարձակռիվ անել ու էլի աստված գիտի, թե ինչ: Կմիանայի նրանց գժություններին…

            Ինչևէ, աղջիկները սենյակներում են, լույսերն անջատված են: Նշանակում է՝ վաղվան պատրաստվելու ժամանակն է: Այստեղ չես նկատում, թե ինչպես է մի օրը մյուսով փոխվում, ոնց է վաղը գալիս ու վերջանում այսօրը: Այստեղ ժամանակը սուբյեկտիվ է հոսում:

Լիլիթ Հակոբյան

Մուտք դեպի հրաշքների թագավորություն

«Արքանե»  աղջիկների առաջնորդության ամառային դպրոցը բացեց իր թագավորության դարպասները Հայաստանի տարբեր ծայրերից ժամանած աղջիկների համար:

Հայոց աշխարհի դինաստիաների անուններ կրող պալատներում մեր փոքրիկ արքայադստրերին էին սպասում ամառային դպրոցի դասընթացավարները՝ «Արքանե» թագավորության փերիները:

«Կատրանե», «Բամբիշ», «Էրատո» և «OG Կեռան» հայոց թագուհիները դարձան մեր արքայադստրերի խմբերի անունները և կառաջնորդեն նրանց ամբողջ ընթացքում:

Կատրանե

Բամբիշ

Էրատո

OG Կեռան

 Երեկոյան խարույկի մոտ հավաքված աղջիկները հանձնեցին կրակին իրենց բնավորության բացասական գծերը և պայմանագիր կնքեցին խարույկի հետ, որ կհաղթեն իրենք իրենց...

Առաջնորդություն

Այժմ ձեր դատին եմ հանձնում իմ վեցերորդ սեմինարը, որի թեման Առաջնոր­դությունն է։ Սեմինարին մասնակցում էին Մ․ Թավրիզյանի անվան քոլեջի առա­ջին կուրսի ուսանողները։ Սեմինարի ընթացքում քննարկեցինք առաջնոր­դության թեմաները, խոսեցինք մեր շրջապատում ներկա առաջնորդների մասին, ներ­կայացրինք մի քանի իրավիճակներ, որտեղ մասնակիցներն առաջ­նորդներ ունեին: Սեմինարն անցավ բարձր տրամադրությամբ, քանի որ մասնկիցներին հետաքրքում էր այդ թեման: Վերջում մասնակիցները հայտնեցին իրենց կարծիքները: Նրանք գոհ էին իրենց նոր ստացած գիտելիքներից ։

Լիլլիթ Գրիգորյան

16 տարեկան

Լոռու մարզ

Քաղաք Վանաձոր

Առողջ ապրելակերպ

Կրկին բարև, ի´մ սիրելի GLOW։ Մարտի 30-ին կազմակերպեցի սեմինար Առողջա­պահություն թեմայով։ Սեմինարն անցկացվեց Վանաձորի՝ արվեստի քոլեջի առաջին կուրսի ուսանողների հետ՝ ֆիզկուլտուրայի ուսուցչուհու ներկայությամբ։ Սկզբում հարցրի մասնակիցներին, թե ինչու է սնունդը կարևոր մեզ համար, և ինչ ենք հաս­կանում առողջ ապրելակերպ ասելով։ Խոսեցինք սննդի խմբերի մասին, և սկսեցինք կառուցել ճիշտ սննդակարգի բուրգը։ Քննարկեցինք ջրի օգտակար հատկու­թյունները, մարմնամարզության տեսակները։ Սեմինարի վերջում խոսեցինք ծխախոտի և ալկոհոլի մասին՝ բացառելով դրանց կիրառությունը։ Կարծում եմ սեմինարի միջոցով մասնակիցները առողջ կապրեն:

Լիլլիթ Գրիգորյան

16 տարեկան

Լոռու մարզ

Քաղաք Վանաձոր