ԱՐՔԱՆԵ աղջիկների տպավորությունները մենթորների հետ հանդիպումներից

ԱՐՔԱՆԵ աղջիկների առաջնորդության և զարգացման ծրագրի շրջանակներում 2015 թվականին ավելացրեցինք ևս մեկ բաղկացուցիչ մաս՝ մենթորություն։

Մենթորությունը գործընթաց է, որի ընթացքում առավել փորձառու, կայացած և հեղինակություն ունեցող անձինք (մենթորները) ուսուցանում, ուղղորդում, խորհրդատվություն են տրամադրում պակաս փորձառու անհատներին (մենթիներին)՝ նպաստելու համար նրանց մասնագիտական կողմնորոշմանը, զարգացմանը և անձնային աճին: Այսպիսով, այն մասնագետն է, ով ստանձնում է խորհրդատուի և ուղղորդողի դերը, որի գործունեությունն ուղղված է երիտասարդի մասնագիտական կողմնորոշմանը և ապագա կարիերայի նախագծմանը: Մենթորը տրամադրում է խորհրդատվություն այն մասին, թե ինչ դասընթացների մասնակցի մենթին, օգնում է սահմանել նպատակներ և խնդիրներ:

2015 թվականի ԱՐՔԱՆԵ ամառային դպրոցի մասնակիցները սկսեցին իրենց հարաբերություննները մենթորների հետ 2015 թվականի սեպտեմբեր - հոկտեմբեր ամիսներին։

Ստորև աղջիկներից երեքը իրենց տպավորություններն են ներկայացնում մենթորների հետ հանդիպումներից։

Մարիամ Հարությունյան

Ես մենթի եմ: Առաջին անգամ, երբ Արքանեում մասնակցեցի մենթորության սեմինարին,  չէի էլ կարող պատկերացնել, որ հետո իմ մոնթորի հետ այսքա՜ն շատ կկապվեմ: Անկեղծ լինեմ, մտածում էի, որ մենթորը չի կարող իր խորհուրդներով կյանքումս այսքան բան փոխել և նույն  մտքերով չէի կարողանում կողնորոշվել, թե ում առաջարկեմ լինել իմ մենթորը: Ընտրեցի մարդու ում ճանաչել եմ, բայց այքան էլ շփում չեմ ունեցել, պարզապես  ճանաչել ու հեռվից սիրել եմ իր տեսակը: Ընդամենը 2 տարի է մենթորս ինձնից մեծ, բայց ամեն անգամ իր խորհուրդներն այնքա՜ն մեծ ազդեցություն են ունենում որոշումներիս վրա: Արդեն մի քանի ամիս է, ինչ պարբերաբար հանդիպում ու զրուցում ենք, երբեմն որպես մենթոր-մենթի, երբեմն՝ ընկերուհիներ, իսկ երբեմն անգամ քույրեր: 

Հիմա վստահաբար կարող եմ ասել, մենթորությունը ամենակարևոր ծրագրերից մեկն է, որ անհրաժեշտ է բոլորիս, ցանկացած տարիքում: Մեզ՝ բոլորիս, անհրաժեշտ է մեկը, ով անկեղծ խորհուրդներ կտա, մի կողմ կդնի իր իսկ ցանկությունները ու սրտացավ կլինի կարիերայիդ, ապագայիդ համար: 

Շնորհակալ եմ քեզ Արքանե: 

Շնորհակալ եմ քեզ Զարին:

 

Ինեսա Զոհրաբյան 

Ողջույն, իմ սիրելի ԱՐՔԱՆԵ,

Մի  քանի ամիս առաջ համաձայնեցի մասնակցել ԱՐՔԱՆԵ ծրագրի շրջանակներում կազմակերպվող մի հիանալի նախագծի` մենթորությանը: Այս նախագիծը հիանալի է անցնում մեր` Արքանեի մասնակիցների համար. այն շատ զարգացնող է, մոտիվացնող, մեծ գիտելիքներ տվող: Մենթորը` ում մենք ենք ընտրել մեզ համար, տալիս է մեծ փորձ, խորհուրդներ՝ կողմնորոշվելու համար , որը դրական ազդեցություն է ունենում մեզ վրա:

Իմ մենթորի հետ հանդիպումներն անցնում են հիանալի: Սա շատ լավ հնարավորություն է իմ բոլոր հարցերը տալու և պատասխաններ ստանալու համար: Իմ բոլոր հարցերը, ակնկալիքները բավարարվում են: Մենթորը կարծես մեծ ուսուցիչ լինի մեզ համար, ով մեզ ճիշտ  կողմնորոշում է: Մենթորի հետ հանդիպելու կոնկրետ ռեժիմ և ժամանակահատված կա, բացի դրանից  մենք կարող ենք շփվել նաև վիրտուալ ձևով (Facebook, Skype և այլն) : Այդ ռեժիմի, կոնկրետ հանդիպումերի ընթացքում  տրված թեմաները շատ հետաքրքիր են: Օրինակ՝ «մասնագիտական կողմնորոշում և ուղղորդում» թեման շատ լավն էր և օգնեց ինձ ավելի ճիշտ կողմնորոշվել, ընտրել այնպիսի մասնագիտություն, որն իրոք աշխատաշուկայում էլ մեծ պահանջարկ կունենա: Եվ ընդհանրապես բոլոր թեմաները ինձ համար ուսուցանող են և ավելի նպատակասլաց դարձնող: Սա մեծ հնարավորություն է նաև լավ կարիերա ունենալու և այն ավելի մեծացնելու համար: Եվ քանի որ մենթորը մեր կողմից է ընտրված շփումը ավելի ազատ է լինում,և  ինքն էլ իրեն լավ է զգում , որ ընտրվել է  մեր կողմից: Այս ամենի շնորհիվ ես սովորեցի ու դեռ շարունակելու եմ սովորել այնպիսի բաներ, որ հնարավոր է ապագայում չստանամ: 
Ես, հանդիսանալով մենթի, կարող եմ նշել , որ մենթորությունը օգնում է զարգանալ և տեղեկատվություն ձեռք բերել:

Տաթևիկ Հարությունյան

Գուցե  փնտրում ես մեկին, ով քեզ կօգնի մեծ և փոքր որոշումներ կայացնելիս, ցանկանում ես կիսվել նպատակներդ, խոսել քեզ հուզող հարցերի մասին և պարզապես գտնել մեկին, ով քեզ կոգեշնչի:

Երևի ,մենթոր ես փնտրում:

-Բար՛և, կդառնաս իմ մենթորը:

-Մեծ հաճույքով:

Այսպիսի պատասխան չէի սպասում մեկից, ում մի քանի օր էր ինչ ճանաչում էի: Եվ ահա պատրաստվում եմ կիսվել շատ հարցերով, լսել նրա խորհուրդները:

Հենց այսպես էլ ներգրավեցի «Արքանե» ծրագրի մենթորության  նախագծում ու սկսեցի մի փոքր ժամանակ  հատկացնել մի ծրագրի համար , որը անծանոթ էր ինձ և անորոշ:

Արդեն մի քանի ամիս է, ինչ ես հաճույքով սպասում եմ ամսվա այն օրերին, երբ կրկին պետք է հանդիպեմ  մենթորիս, և հետաքրքիր քննարկումներ անցկացնենք:

Ծրագիրը շարունակվում է, սակայն այսօր էլ կարող եմ ասել, որ ուրախ եմ  մասնակցելու, նոր բան ստանալու համար:

   
 

Մաքրենք մեր շրջապատը

Դեկտեմբերի 22-ին, Քարակերտի թիվ 1 միջն. դպրոցում իրականացրեցի երկրորդ դասընթացը՝ բնապահպանություն թեմայով, որին մասնակցեցին 6-րդ դասարանի 13 աշակերտներ: 

Դասընթացի ընթացքում մասնակիցներին ներկայացվեցին տարբեր բնապահպանական խնդիրներ, ինչպես նաև  քննարկվեցին իրենց համայնքում գոյություն ունեցող խնդիրները:

Վերջում երեխաները սովորեցին՝ ինչպես վերամշակել ավելորդ իրերը, և պլաստիկ շշերի վերամշակման արդյունքում աշակերտները ստացան կավճաման և ծաղկաման, որոնք  գործածվելու են իրենց դասարանում: 

Մասնակիցներից մեկը՝ Նորիկ Գևորգյանը ասում է.

_<< Ես երբեք չէի պատկերացնի, որ աղբից կարելի է այս տեսակ հետաքրքիր իրեր պատրաստել_>> :

 Ազնվիկ Կարապետյանը, ով ևս 6-րդ դասարանից է, ասում է.

_ՙ<< Երբ գնամ տուն, կփորձեմ աղբի վերամշակման ուրիշ ձևեր գտնել և օգնել, որ մենք մաքուր բնություն ունենանք_>> :

Անի Գևորգյան

Արմավիրի մարզ,

գյուղ Քարակերտ

Մեր իրավունքները

Դեկտեմբերի 9-ին, Քարակերտի թիվ 1 միջն. դպրոցում իրականացրեցի մարդու իրավունքներին ուղղված դասընթաց: Դասընթացին մասնակցեցին 7-րդ դասարանի 19 աշակերտ: Դասընթացը բաղկացած էր 3 փուլից:  Առաջին փուլում երեխաները ներկայացրին, թե ինչ իրավունքներ իրենք գիտեն: Երկրորդ փուլում երեխաների համար պարզաբանվեց  իրենց իրավունքները՝ տարբեր օրինակների ներկայացման միջոցով: Երեխաները նաև սովորեցին, թե հարկ եղած դեպքում, որ մարմիններին նրանք պետք է դիմեն: Այս ամենից զատ՝ դասընթացի մասնակիցները տեղեկացան իրենց պարտականությունների մասին: Իսկ երրորդ փուլում երեխաները բաժանվեցին 2 խբի և ներկայացրին իրավունքի խախտման իրենց օրինակը՝ բեմադրության տեսքով: Երեխաներին տրամադրվեցին որոշ պարագաներ, որոնք նրանք կարող էին օգտագործել՝ գործի դնելով իրենց ստեղծագործելու ունակությունը: Առաջին խմբի բեմադրությունը խոսքի իրավունքի մասին էր, իսկ երկրորդ խմբինը՝ սեփականության:

Պատրաստվելու համար երեխաներին տրվեց 20 րոպե:

 Մասնակից Նորա Կարապետյանը տպավորված էր.
^<< Շատ հետաքրքիր դասընթաց էր: Հիմա ես գիտեմ իմ իրավունքներից մի քանիսը, և երբ տուն գնամ, կփորձեմ ավելին սովորել դրանց մասին^>>:

 Երեխաները վերադարձան տուն նոր դասընթացի ակնկալիքով:

Անի Գևորգյան

Արմավիրի մարզ,

 գյուղ Քարակերտ

Ամանորյա երազանքներ

Այս տարի Ամանորին ընդառաջ, որոշեցի նորարարություն մտցնել իմ գյուղում: Գյուղի տոնածառը ամեն տարվա նման զարդարելու փոխարեն որոշեցի այն զարդարել գյուղի բնակիչների երազանքներով:Ես հանդիպում ունեցա մեր գյուղապետի հետ և ստանալով նրա թույլտվությունը անցա գործի: Ինձ աջակցեցին իմ ընկերները: Մենք արդեն հավաքել ենք բոլոր երազանքները, շուտով դրանք կդառնան տոնածառի խաղալիքներ և կզարդարեն գյուղի տոնածառը:
Անուշ Մկրտչյան
Արմավիր

 

«Ոչ ծխախոտին» առողջապահական երկօրյա սեմինար

Առողջությունը երջանկության նման է, երբ նրան չենք նկատում ուրեմն նա կա: Իսկ երջանիկ հասարակությունը իրենից ենթադրում է առողջ մտածելակերպով և գիտելիքներով զինված աղջիկներ և տղաներ: Իմ` աղջիկների առաջնորդության ճամբարի փոքր դրամաշնորհային ծրագիրը, որքան էլ զարմանալի է, իրենից ներկայացնում էր երկօրյա առողջապահական սեմինար տղաների հետ:

Նոյեմբերի 28 և 29-ը մնացած բոլոր շաբաթ-կիրակիների նման չէր: Այս անգամ 12-14 տարեկան մոտ 20 տղաներ, զոհելով իրենց հանգիստը, եկել էին Վայքի հիմնական դպրոց նոր գիտելքներ ստանալու, իրենց ունեցած գիտելիքներն ամրապնդելու և հաճելի ժամանակ անցկացնելու: Ի՞նչ հասցրեցինք անել մենք: Նախ ծանոթացանք միմյանց հետ: Միայն անունները բոլորս էլ գիտեինք, մենք անկեղծացանք «Ձեռք» կոչվող խաղի միջոցով. իմացանք մեկս մյուսի նախասիրությունները, ապագա մասնագիտությունը և նույնիսկ այն,թե ինչն է մեզ զայացնում: Պարզեցինք յուրաքանչյուրիս`այս սեմինարին մասնակցելու անձնական մոտիվացիան: Անցնելով բուն թեմային մտագրոհի միջոցով պարզեցինք, թե յուրաքանչյուր ոք ինչ է հասկանում առողջություն ասելով, ոչ ֆորմալ կրթության եղանակով ակադեմիական գիտելիքներ ստացանք, սովորեցինք թե ինչ է թիմային աշխատանքը, մեկս մյուսին հանդուրժելու կարողություն ձեռք բերեցինք: Պարզենցինք թե ինչպես սնվել առողջ և այն, թե ինչ սովորություններ ունենք մենք`հայերս, որ այնքան էլ օգուտ չեն բերում մեզ և մեր առողջությանը: «Ոչ ծխախոտին» պասառներ պատրաստեցինք, որոնք իրենց տեղը գտան մարդաշատ վայրերում: Երկրորդ օրվա վերջում մենք մեր` այս երկու օրվա ընթացքում ստացած գիտլիքները ստուգեցինք արցաթերթիկի միջոցով և մրցանակներ ստացանք:
 
Վերջացնելով միտքս կցանկանայի շնորհակալություն հայտնել Վայքի հիմնական դպրոցի տնօրինությանը`տարածքը տրամադրելու համար, Լուսինե Հովհաննիսյաին և Մուշեղ Վարդանյանին սեմինարները ֆոտոներով լուսաբանելու համար և վերջապես ամենամեծ «մեղավորներին» Ստեփանավանի Երիտասարդական կենտրոնին և «Արքանե» ամառային դպրոցի կազմակերպիչներին`ինձ նման հնարավորություն ընձեռնելու համար:

Լուսինե Կարապետյան

ԱՐՔԱՆԵ 2015 ամառային դպրոցի շրջանավարտ

Վայոց ձոր

ԱՐՔԱՆԵՆ ՇԱՐՈՒՆԱԿՈՒՄ Է ՀՅՈՒՐԸՆԿԱԼՎԵԼ ՆՈՐ ԱՐՔՈՒՆԻՔՆԵՐՈՒՄ

 «Ընտանիքը սկսվում է երեխաներից»:

-Վոլֆրամ Գյոթե

Ստեփանավանի երիտասարդական կենտրոնը ԱՐՔԱՆԵ աղջիկների առաջնորդության և զարգացման ծրագրի շրջանակներում ՀՀ բոլոր մարզերում կազմակերպում և իրականացնում է մարզային դասընթացներ 12-16 տարեկան աղջիկների և տղաների համար՝ նպատակ ունենալով ձևավորել տեղեկացված, ակտիվ՝ համայնքային փոփոխությունների պատրաստ, նախաձեռնող և իրականացնող առաջնորդ պատանիներ:

Շիրակի մարզի Գյումրի քաղաքում՝ «Գյումրի քաղաքի երեխաների սոցիալական հոգածության կենտրոն» ՊՈԱԿ-ի հյուրընկալ տարածում տեղի ունեցավ հերթական դասընթացը:

Դասընթացը նվիրված էր ընտանեկան բռնության՝ որպես սոցիալ-հասարակական հիմնախնդրի լուսաբանմանը,  վերջինիս վերաբերյալ դեռահասների մոտ ընդհանուր գիտելիքների ձևավորմանը,  Զանգվածային Առցանց Բաց Դասընթացի (MOOC)  ծանոթացմանը՝ որպես լավագույն համալսարանների ու դասախոսների մասնակցությամբ ժամանակակից առցանց ուսուցման ձև:

Թվով 18 պատանիներ ձեռք բերեցին գիտելիքներ ընտանեկան բռնության առանձնահատկությունների, տեսակների, վարքային դերսևորումների, ընտանեկան բռնության վերաբերյալ գործող առասպելների վերաբերյալ:

Խաղ-վարժանքների միջոցով մասնակիցները կարողացան նույնականացնել և ճանաչել ընտանեկան բռնության դեպքերը, տարբերակալ ներընտանեկան կոնֆլիկտները ընտանեկան բռնության դեպքերից: Նրանց մոտ ձևավորվեց ընդհանուր գիտելիքներ MOOC-ի՝ զանգվածային առցանց բաց դասըթացներից օգտվելու հնարավորությունների վերաբերյալ:

Համայնքային ծրագիր Մարգահովիտ համայնքի գրադարանում

ԱՐՔԱՆԵ ծրագրի շրջանակներում շրջանավարտներին հնարավորություն է ընձռնվել ստանալ փոքր դրամաշնորհներ իրենց համայքներում ծրագրեր իրականացնելու համար: Դրամաշնորհային մրցույթի հաղթող 9 ծրագրերը բազմաբնույթ են` դասընթացներ, ֆլեշմոբեր, այգու պատրաստում և  գրադարանի անբարեկարգ գրքերի վերանորոգման աշխատանքները: 

Ծրագրի շրջանավարտ Մարիամ Կոծինյանը, իր ծրագիրն իրականացրել է Լոռու մարզի Մարգահովիտ գյուղական համանքում: Դեկտեմբերի 11-ին BooKinisT ծրագրով Մարիամն իր տարեկիցների հետ միասին համայնքի դպրոցին պատկանող գրադարանում վերանորոգել են 85 անբարեկարգ գրքեր:

Հասակակցի կրթության դասընթաց կոնֆլիկտներ թեմայով

Բարև իմ շատ սիրելի ԱՐՔԱՆԵ! Ցանկանում եմ տեղեկացնել, որ դեկտեմբերի 3-ին ֆիզմաթ դպրոցում իրականացրեցի «Կոնֆլիկտներ» թեմայով սեմինարը, որը կազմակերպել եմ ԱՐՔԱՆԵ դրամաշնորհային ծրագրի շրջանակներում։ Սեմինարը կազմակերպել էի 7-8–րդ դասարանցի աղջիկների համար։ Մեզ հետ էր նաև ընկ. Մանեն։ Բոլորով միասին քննարկեցինք կոնֆլիկտների տեսակները, առաջացման պատճառները, լուծման մեթոդները։ Այդ օրը ես և բոլոր ընկերներս ապրեցինք շատ հետաքրքիր զգացողություններ։ Եվս մեկ անգամ կհանդիպենք դեկտեմբերի 10-ին կրկին Ֆիզմաթում։

Անահիտ Բաղշեցյան

ԱրքաՆե 2015 ամառային դպրոցի շրջանավարտ

Տարեկցի կրթության դասընթաց Գյումրիում

Ողջույն! Նոյեմբերի 27-ին Գյումրու Լորդ Բայրոնի անվան թիվ 20 դպրոցում տեղի ունեցավ իմ այդքան երկար սպասված սեմինարը ''Ընտանեկան բռնություն և Մարդու իրավունքներ'' թեմայով: Շատ ոգևորիչ էր ինձ համար մեկ ժամում զգալ ինձ որպես դասընթացավար և հաճելի էր աշխատել իմ հասակակիցների հետ ու նրանց փոխանցել իմ գիտելիքները: Մասնակիցների հետ միասին խոսեցինք մարդու իրավունքների մասին, նրանցից յուրաքանչյուրը յուրովի ներկայացրեց իր պատկերացումը փոքրիկ խմբային բեմականացման շնորհիվ  Կարճամետրաժ ֆիլմ դիտեցինք և քննարկեցինք, սահիկահանդեսի միջոցով մասնակիցները իրազեկվեցին ընտանեկան բռնության դեպքերի մասին, ինչպես նաև յուրաքանչյուր թիմին տրվեց համապատասխան պատմություն, որն էլ մասնակիցները կարդալով փորձեցին գուշակել բռնության տեսակը և ներկայացնել այն: Իհարկե առաջին անգամն էր և փոքր ինչ դժվար, բայց հուսամ հաջոդ անգամ ավելի հետաքրքիր կլինի: Ուզում եմ նշել, որ իմ սեմինարին ներկա էր նաև իմ շատ սիրելի Ընկեր Ալմիրան և իր խորհուրդները ինձ մեծապես օգնեցին: Եվ իհարկե մեծ շնորհակալություն Արքնաեին, նման հնարավորություն ընձեռնելու համար:

Անահիտ Հակոբյան

ԱրքաՆե 2015 ամառային դպրոցի շրջանավարտ